Мемлекеттік тілде іс қағаздарды қашықтықтан оқыту әдістемесі

КІРІСПЕ

       Зерттеудің өзектілігі. Еліміздегі білім жүйесіндегі өзгерістер мен жаңалықтар қазақ тілін оқыту мәселесін де жаңа қырынан дамытуды қажет етіп отырғаны белгілі. Жоғары білім беру жүйесінде әлемдік білім кеңістігіне кіру үшін іргелі реформалар жүргізілуде. Қазақстан Республикасының Білім және Ғылым министрлігі білім беру нормаларын мақұлдаған Лиссабон конвенциясын, жоғары білім саласы мен  кұрылымындағы бірізділікке қатысты Сорбон декларациясын қолдап, белсенді араласуға талпыныс жасап жатқаны мәлім. Сонымен бірге еліміздің Болон үдерісіне қосылуы білім беру жүйесіне тың өзгерістер енгізіп, оқыту үдерісінде жаңа әдістерді қолдануды қажет етіп отыр.

      Қазіргі таңда еліміздің білім беру жүйесінде қолданылып жүрген білім беру технологиялары отандық білімнің жаңа талаптары мен республиканың саяси-экономикалық таңдауына сай қолданылып келеді. Осындай өмірдің өзі талап етіп отырған технологияның бірі – қашықтан оқыту технологиясы. Соңғы 10-15 жылдың ішінде телекоммуникациялық технологияның және гипермедияның қарқынды дамуына байланысты оқытуда компьютерді қолданудың тиімділігі артып отырғаны мәлім. Бүкіл әлемді қамтитын «Интернет» желілік байланысы қашықтан білім беру жүйесінің пайда болуына негіз болды. Ғылым мен техниканың дамуы білімді ақпараттандыру үдерісін жетілдіруді талап етті. Сонымен бірге әлеуметтік өмірдің барлық саласында қазақ тілінің кеңінен қолданысқа ие болуы қашықтан оқыту жүйесін іске асыруды қажет етіп отыр.

       Қоғамның ақпараттандырылуы студенттерден жаңа ақпаратты құралдарды барлық салада қолдана алуын талап етеді. Жоғары оқу орындарының қазақ бөлімінде оқитын студенттерге іс қағаздарын қашықтан оқыту, біріншіден, мемлекеттік тілді оқытудың ғылыми-теориялық және әдістемелік жағының жоғары болуына, екіншіден, студенттің кәсіби құзіреттілігінің жетілуіне, үшіншіден, уақыт үнемдеуге, төртіншіден, алыста тұратын тыңдаушыларға білім алуға көмектеседі.

      Қашық нысаны бойынша оқыту Қазақстан Республикасы Президентінің  елде білім беруді дамытудың 2005-2010 жылдарға арналған мемлекеттік бағдарламасын іске асыру мақсатында «Білім туралы» Заңына сәйкес әзірленді [1,66 б.].

       Кәсіби құзіреттілікті жетілдіруді қажет ететін заманда өзінің арнайы мамандығына қатысты білімді жаңартып отыру, оқытудың тиімді де ұтымды түрін қолдану қажеттігі туып отыр. Еліміздің экономикалық және әлеуметтік, мәдени жағдайына сай, қоғам өмірінің барлық салаларында өзін-өзі жетілдіріп, дамытатын, барлық іс-әрекеттерде шығармашылық бағыт ұстанатын білікті де білімді маман тәрбиелеу – өзекті мәселе. Жоғары оқу орнының қазақ бөлімінде оқитын студенттерге іс қағаздарын қашықтан оқытудың зерттеу нысаны болмағандығы және заманның болашақ мамандардан іс қағаздарын жетік меңгеруді талап етуі қазақ тілін мамандыққа қатысты оқытудың маңыздылығын, жұмыстың өзектілігін танытады.

        Зерттеудің мақсаты. Жоғары оқу орнының практикалық қазақ тілі сабағында іс қағаздарды қашықтан оқытудың әдістемелік жүйесін ұсыну, оның тиімділігін эксперимент арқылы дәлелдеу.

      Зерттеу нысаны – жоғары оқу орнының қазақ бөлімі студенттеріне іс қағаздарды қашықтан оқыту арқылы меңгерту үдерісі.

 Зерттеу пәні – жоғары оқу орнының қазақ бөлімдерінде мемлекеттік тілдегі іс қағаздарды қашықтан оқытудың әдістемесі.

 Зерттеудің міндеттері:

      – қашықтан оқыту жүйесінің ғылыми-теориялық негізін анықтау;

      – мемлекеттік тілде іс қағаздарды жүргізу курсының мазмұнын анықтау;

      – қазіргі заманғы желілік жүйенің (интернет) ерекшеліктерін көрсетіп, іске асу жолдарын белгілеу;

      – іс қағаздарды мемлекеттік тілде меңгертудің ұтымды жолдарын көрсету;

      – іс қағаздарды қашықтан меңгертуде қолданылатын жаттығулардың түрлерін саралау;

      – іс қағаздарды қашықтан оқыту арқылы өздік жұмыстардың, жаттығулардың, шығармашылық деңгейдің, тестілік тапсырмалардың әдістемелік  ерекшеліктерін дәйектеу;

      – жоғары оқу орындарында іс қағаздарды қашықтан оқытудың тиімділігін эксперимент нәтижелеріне сүйеніп дәлелдеу.

      Зерттеу болжамы. Мемлекеттік тілде іс қағаздарды оқытқанда желілік технологияны(интернет) қолданса; студенттерге іс қағаздарды меңгерту арнаулы тақырыптар бойынша ұсынылатын кешенді тапсырмалар мен жаттығулар негізінде жүргізілсе, оқытудың нәтижелілігі мен тиімділігі артады. Кешенді жұмыс түрлері болашақ мамандардың қазіргі ақпаратты технологияны қоса меңгеріп шығуын қамтамасыз етеді. Кәсіби мамандарды дайындау барысында іс қағаздарды игеруге арналған тапсырмалар тілді сапалы және жан-жақты меңгертуге, жүйеленген терминдер студенттердің кәсіби сөздік қорын байытуға мүмкіндік жасайды.

      Зерттеудің жетекші идеясы. Қазақ тіліндегі іс қағаздарды қашықтан оқыту ҚР азаматтарына мемлекеттік құжаттарды терең меңгеруге, сапалы білім алуға және олардың кәсіби маман болуына игі ықпал етеді. Іс қағаздарды қашықтан оқыту қазақ тілінің  қоғамдық-әлеуметтік рөлін арттыруға, студенттердің кәсіби бағыттылығының қалыптасуына әсер етеді. Іс қағаздарды қашықтан оқыту студенттердің іс қағаздарды сауатты толтыруына мүмкіндік туғызады. Құжаттармен жұмыс істеу барысында студенттердің адамдармен қарым-қатынас жасау этикасын жетілдіреді.

      Зерттеудің әдіснамалық негізі. Зерттеуде қашықтан оқыту технологиясына қатысты, психология, педагогика, әлеуметтану, қазақ тілін оқыту әдістемесі, соның ішінде іс қағаздарды теориялық негізде меңгертуге арналған ғылыми-әдістемелік зерттеу еңбектері мен оқулықтар, оқу құралдары басшылыққа  алынды.

 Зерттеудің әдістері. Жұмыста теориялық талдау әдістері, баяндау, салыстыру, сараптау, модельдеу, жинақтау, жүйелеу, талдау, қорыту, тәжірибеден өткізу, бақылау әдістері қолданылды.

Бағасы: 2550 тг

Жұмысты көшіру үшін Сатып алу мәзірінен толығырақ мәліметті алыңыз